काठमाडौँ । हरितालिका तीजको अवसरमा पशुपतिनाथ मन्दिरमा आउने दर्शनार्थीको सुरक्षा तथा व्यवस्थापनका लागि सशस्त्र प्रहरी बल नेपालले करिब ८ सय जनशक्ति परिचालन गरेको छ।
सशस्त्र प्रहरीले सोमबार बिहान २ बजेदेखि नै पशुपति क्षेत्र तथा आसपासमा सुरक्षा, शान्ति–सुरक्षा र स्वास्थ्य सेवाका लागि सुरक्षाकर्मी परिचालन गरेको जनाएको छ।
दर्शनार्थीको स्वास्थ्य उपचारका लागि नेपाल एपीएफ अस्पताल बलम्बुबाट महिला चिकित्सकसहितको मेडिकल टोली र एम्बुलेन्स पशुपति क्षेत्रमा तैनाथ गरिएको छ। त्यस्तै, दर्शनार्थीलाई खानेपानी उपलब्ध गराउन प्रधान कार्यालयबाट ट्यांकरसहितको टोली परिचालन गरिएको छ।
सम्भावित दुर्घटना तथा नदीजन्य जोखिमलाई मध्यनजर गर्दै पशुपति क्षेत्रको राम मन्दिरनजिक बागमती नदी किनारमा गोताखोरसहितको उद्धार टोलीलाई तयारी अवस्थामा राखिएको सशस्त्र प्रहरीले जनाएको छ।
तीजको मेला अवधिभर अवाञ्छित गतिविधि नियन्त्रण गर्न मन्दिर परिसर र आसपासका क्षेत्रमा निगरानीसमेत बढाइएको छ। सादा पोसाकका सुरक्षाकर्मी परिचालन गर्नुका साथै तिलगंगा, जय बागेश्वरी, गुह्येश्वरी, विश्वरूपा मन्दिर र गौरीघाटलगायत क्षेत्रमा नियमित गस्ती बढाइएको छ।
सुरक्षा व्यवस्थापन तथा विभिन्न निकायबीच आवश्यक समन्वयका लागि पशुपतिनाथ मन्दिर परिसरमा कमान्ड पोस्ट स्थापना गरिएको सशस्त्र प्रहरी बलका सहप्रवक्ता डिएसपी शैलेन्द्र थापाले जानकारी दिए।
