काठमाडौं । सरकारले काठमाडौं उपत्यकामा एक हजारभन्दा बढी बिक्री केन्द्रमार्फत प्रतिकेजी ११० रुपैयाँमा चिनी बिक्री भइरहेको जनाएको छ ।
वाणिज्य, आपूर्ति तथा उपभोक्ता संरक्षण विभागले बुधबार प्रेस विज्ञप्ति जारी गर्दै उपत्यकामा चिनीको अभाव नरहेको स्पष्ट पारेको हो । विभागले उपभोक्तालाई आवश्यकताभन्दा बढी चिनी मौज्दात नगर्नसमेत आग्रह गरेको छ ।
चाडपर्व नजिकिँदै गर्दा बजारमा चिनीको अभाव हुन थालेको र मूल्य मनोमानी रूपमा बढाइएको गुनासो सार्वजनिक भएपछि विभागले यस्तो जानकारी दिएको हो ।
विभागका अनुसार उद्योग, वाणिज्य तथा आपूर्ति मन्त्रीको अध्यक्षतामा मंगलबार सरोकारवालासहित बसेको बैठकको सहमतिअनुसार उपत्यकाका एक हजारभन्दा बढी खुद्रा तथा थोक बिक्री केन्द्रबाट प्रतिकेजी ११० रुपैयाँमा चिनी सहज रूपमा उपलब्ध गराइएको छ ।
भाटभटेनी, बिगमार्ट र सेल्सबेरीलगायतका बिक्री केन्द्रबाट समेत तोकिएको मूल्यमा चिनी बिक्री भइरहेको विभागले जनाएको छ ।
