काठमाडौँ । जापानमा जारी बीऔँ एसियाली खेलकुदअन्तर्गत पुरुष क्रिकेटको क्वार्टरफाइनलमा श्रीलङ्कासँगको खेल वर्षाका कारण रद्द भएपछि नेपाल प्रतियोगिताबाट बाहिरिएको छ।
नागोयास्थित कोरोगी स्पोर्टस पार्कमा आज नेपाल र श्रीलङ्काबीच क्वार्टरफाइनल खेल तय गरिएको थियो। तर, लगातारको वर्षाका कारण मैदान खेलका लागि तयार हुन नसकेपछि टससमेत हुन सकेन। नेपाल क्रिकेट सङ्घ (क्यान) का अनुसार वर्षा नरोकिएपछि खेल रद्द गरिएको हो।
खेल रद्द भएपछि प्रतियोगिताको नियमअनुसार ट्वान्टी–२० अन्तरराष्ट्रिय वरियतामा माथिल्लो स्थानमा रहेको श्रीलङ्कालाई विजेता घोषणा गरिएको हो। यससँगै श्रीलङ्का सेमिफाइनलमा प्रवेश गरेको छ भने नेपाल प्रतियोगिताबाट बाहिरिएको छ।
हालको ट्वान्टी–२० अन्तरराष्ट्रिय वरियतामा श्रीलङ्का नवौँ तथा नेपाल १४औँ स्थानमा छन्। खेल सञ्चालन हुन नसकेको अवस्थामा वरियतामा माथिल्लो स्थानमा रहेको टोलीलाई विजेता मानेर अर्को चरणमा पठाउने प्रतियोगिताको प्रावधानअनुसार श्रीलङ्काले अन्तिम चारमा स्थान बनाएको हो।
नेपालले यस प्रतियोगितामा समूह चरणको पहिलो खेलमा अफगानिस्तानलाई पाँच विकेटले पराजित गरेको थियो। समूह चरणको अन्तिम खेलमा आयोजक जापानसँगको खेल वर्षाका कारण प्रभावित भएपछि दुवै टोलीले अङ्क बाँडेका थिए। त्यसपछि नेपाल क्वार्टरफाइनलमा पुगेको थियो।
नागोयामा शनिबारदेखि निरन्तर वर्षा भइरहेको छ। खराब मौसमका कारण नेपालका पछिल्ला खेलहरू प्रभावित हुँदै आएका थिए। क्वार्टरफाइनलमा समेत खेल्न नपाई बाहिरिएपछि नेपालले एसियाली खेलकुदमा सेमिफाइनल पुग्ने लक्ष्य पूरा गर्न सकेन।
