काठमाडौं: आईसीसी पुरुष क्रिकेट विश्वकप लिग-२ अन्तर्गत शनिबार ओमानमा भएको खेलमा नेपाल क्यानडासँग २४ रनले पराजित भएको छ। टस जितेर पहिले ब्याटिङ गरेको क्यानडाले निर्धारित ५० ओभरमा सबै विकेट गुमाएर २ सय ५६ रन बनाएको थियो। जवाफी ब्याटिङमा उत्रिएको नेपाल ४६ ओभरमा अलआउट भयो।
नेपालका लागि अर्जुन कुमालले सर्वाधिक ८७ रन बनाए। क्यानडाका लागि ओपनर युवराज सामराले १ सय १७ बलमा ४ छक्का र ११ चौकाको मद्दतले १ सय ५ रन जोडे। यस्तै आरोन जोन्सनले ३६, हर्ष थाकेरले ३४ र कप्तान हमजा तारिकले ३० रन बनाए। ओपनिङ विकेटका लागि सामरा र जोन्सनले ७२ रनको साझेदारी गरेका थिए भने सामरा र थाकेरले ८८ रनको साझेदारी गरे।
नेपालका लागि बलिङमा ललित राजवंशीले १० ओभरमा २ मेडन राख्दै ३९ रन खर्चेर ४ विकेट लिए। कप्तान सन्दीप लामिछानेले ३ विकेट हात पारे, जसमा ४८औं ओभरमा लिएका लगातार दुई विकेट सामेल छन्। दीपेन्द्रसिंह ऐरीले २ र रोहित पौडेलले १ विकेट लिए।
यो हारसँगै नेपाल अंक तालिकाको सातौं स्थानमा झरेको छ। ३५ खेलबाट २८ अंक जोडेको नेपाल अब सोमबार आयोजक ओमानसँग खेल्नेछ। क्यानडा भने २९ अंकसहित छैटौं स्थानमा उक्लिएको छ। ओमानविरुद्धको खेल नेपालका लागि निर्णायक हुनेछ। उक्त खेलमा विजयी भए नेपाल ३० अंकसहित छैटौं स्थानमा रहनेछ, तर पराजित भएमा छैटौं स्थानमा पुग्ने नेपालको सम्भावना समाप्त हुनेछ।
