एजेन्सी । इंग्ल्यान्डका कप्तान तथा बायर्न म्युनिखका स्ट्राइकर ह्यारी केनले प्रतिष्ठित बालोन डी’ओर अवार्ड जितेका छन् । लन्डनमा आयोजित समारोहमा केनलाई पुरुषतर्फ वर्षको उत्कृष्ट फुटबल खेलाडी घोषित गरिएको हो ।
३३ वर्षीय केन सन् २००१ मा माइकल ओवेनपछि बालोन डी’ओर जित्ने पहिलो इंग्लिस खेलाडी बनेका छन् । उनी यो अवार्ड जित्ने पाँचौँ इंग्लिस खेलाडी हुन् । यसअघि स्टान्ली म्याथ्युजले सन् १९५६, बबी चार्ल्टनले सन् १९६६ तथा केभिन किगनले सन् १९७८ र १९७९ मा यो अवार्ड जितेका थिए ।
गत सिजन बायर्न म्युनिखका लागि उत्कृष्ट प्रदर्शन गरेका केनले क्लबका तर्फबाट ५१ खेलमा ६१ गोल गरेका थिए । यो एक सिजनमा बायर्नका कुनै पनि खेलाडीले गरेको सर्वाधिक गोल हो । इंग्ल्यान्डको राष्ट्रिय टोलीबाट खेलेका खेलसमेत जोड्दा उनले ६५ खेलमा ७३ गोल र आठ असिस्ट गरेका थिए ।
यद्यपि, गत सिजन केनले क्लब तथा राष्ट्रिय टोलीबाट कुनै पनि प्रमुख उपाधि जित्न सकेका थिएनन् । बायर्न च्याम्पियन्स लिगको सेमिफाइनलबाट बाहिरिएको थियो भने इंग्ल्यान्ड पनि विश्वकपको सेमिफाइनलमा पराजित भएको थियो ।
बालोन डी’ओर जितेसँगै केन सन् १९८१ मा कार्ल-हेन्ज रुमेनिग्गेपछि यो अवार्ड जित्ने पहिलो बायर्न म्युनिखका खेलाडी बनेका छन् । पुरुषतर्फ रियल म्याड्रिड तथा फ्रान्सका किलियन एम्बाप्पे दोस्रो र बार्सिलोना तथा स्पेनका युवा फरवार्ड लामिन यामल तेस्रो स्थानमा रहे ।
केनको सफलताको खुसीयालीमा सोमबार राति लन्डनस्थित वेम्बली रंगशालाका आर्चहरू सुनौलो रङमा उज्यालो पारिएको थियो ।
पुटेलासलाई तेस्रोपटक महिला बालोन डी’ओर
स्पेन तथा बार्सिलोनाकी मिडफिल्डर एलेक्सिया पुटेलासले महिला बालोन डी’ओर अवार्ड जितेकी छन् । ३२ वर्षीया पुटेलासले कीर्तिमानी तेस्रोपटक यो अवार्ड जित्दै स्पेनको दबदबा कायम राखेकी छन् ।
सन् २०२५–२६ को सिजन बार्सिलोनालाई च्याम्पियन्स लिगसहित चार उपाधि दिलाउन महत्त्वपूर्ण भूमिका खेलेकी पुटेलासले यसअघि सन् २०२१ र २०२२ मा पनि महिला बालोन डी’ओर जितेकी थिइन् । उनी तीनपटक यो अवार्ड जित्ने स्पेनकी एइताना बोनमतीसँगै दोस्रो खेलाडी बनेकी छन् ।
बोनमतीले सन् २०२३, २०२४ र २०२५ मा लगातार तीनपटक यो अवार्ड जितेकी थिइन् । पछिल्ला छ संस्करणमा महिला बालोन डी’ओर स्पेनका पुटेलास र बोनमतीले जितेका छन् ।
पुटेलासले सन् २०२२ मा घुँडाको एन्टेरियर क्रुसिएट लिगामेन्ट (एसीएल) मा गम्भीर चोट बेहोरेकी थिइन् । करियर नै प्रभावित हुन सक्ने चोटबाट फर्किएर विश्व फुटबलको सर्वोच्च व्यक्तिगत सम्मान पुनः जित्नु उनका लागि विशेष उपलब्धि बनेको छ ।
‘ला रेइना’ अर्थात् ‘रानी’ उपनामले चिनिने पुटेलासले गत सिजन सबै प्रतियोगितामा २१ गोल गर्नुका साथै १३ असिस्ट गरेकी थिइन् । उनले महिला च्याम्पियन्स लिगमा सात गोल गरेकी थिइन् । बार्सिलोनाले पछिल्ला छ सिजनमा चौथोपटक युरोपेली उपाधि जित्दा उनको योगदान महत्त्वपूर्ण रहेको थियो ।
गत जुलाईमा पुटेलास इंग्ल्यान्डको महिला सुपर लिग क्लब लन्डन सिटी लायनेसमा आबद्ध भएकी थिइन् ।
अन्य अवार्ड विजेताहरू
समारोहमा विभिन्न विधाका अवार्ड पनि वितरण गरिएको थियो । पुरुषतर्फ स्पेनका प्रशिक्षक लुइस डे ला फुएन्ते वर्षको उत्कृष्ट प्रशिक्षक घोषित भए भने महिलातर्फ बार्सिलोनाका पेरे रोमेउले अवार्ड जिते ।
पुरुषतर्फ बार्सिलोना तथा स्पेनका लामिन यामल वर्षको उत्कृष्ट युवा प्रतिभा घोषित भए । महिलातर्फ यही अवार्ड बार्सिलोना तथा स्पेनकी भिकी लोपेजले जितिन् ।
पुरुषतर्फ वर्षको उत्कृष्ट स्ट्राइकरको अवार्ड केनले जित्दा महिलातर्फ मेक्सिकोकी चार्लिन कोरल उत्कृष्ट घोषित भइन् । पुरुषतर्फ उत्कृष्ट गोलकिपर स्पेनका उनाइ सिमोन बने भने महिलातर्फ बार्सिलोनाकी काता कोलले अवार्ड जितिन् ।
क्लबतर्फ पुरुषमा पेरिस सेन्ट जर्मेन (पीएसजी) वर्षको उत्कृष्ट क्लब घोषित भयो भने महिलातर्फ बार्सिलोना उत्कृष्ट क्लब बन्यो ।
यसैगरी, मानवीय तथा सामाजिक कार्यमा योगदान पुर्याएबापत प्रदान गरिने सोक्रेटिस अवार्ड इंग्ल्यान्ड तथा आर्सनलका फरवार्ड बुकायो साकाले जितेका छन् ।
