काठमाडौँ । राष्ट्रिय स्वतन्त्र पार्टी (रास्वपा)ले आगामी स्थानीय तहको निर्वाचनका लागि उम्मेदवार छनोट प्रक्रियालाई थप व्यवस्थित, पारदर्शी र योग्यतामा आधारित बनाउने उद्देश्यले देशभरका निर्वाचन क्षेत्र समितिहरूसँग सुझाव मागेको छ।
रास्वपाले सबै निर्वाचन क्षेत्र समितिहरूबाट उम्मेदवार छनोटको रूपरेखा निर्माणका लागि आधिकारिक रूपमा सुझाव माग गरेको हो ।
आगामी स्थानीय तहको निर्वाचनमा उम्मेदवार चयन प्रक्रियालाई वैज्ञानिक, विश्वसनीय र जनमुखी बनाउनको लागी यस्तो पहल गरिएको पत्रमा उल्लेख गरेको छ ।
वैशाख ७ गते बसेको केन्द्रीय समिति बैठकले सह-महामन्त्री विपिनकुमार आचार्यको संयोजकत्वमा सात सदस्यीय स्थानीय निर्वाचन उम्मेदवार छनोट रूपरेखा तथा क्यान्डिडेट क्लब सम्पादन समिति गठन गरेको छ। उक्त समितिको वैशाख १४ गते बसेको बैठकले संघीय निर्वाचनको अनुभव र सिकाइलाई आधार मान्दै स्थानीय तहका लागि उम्मेदवार छनोटको मापदण्ड तयार गर्ने निर्णय गरेको थियो।
पार्टीले मातहतका निर्वाचन क्षेत्र समितिहरूलाई आफ्नो समितिमा गहन छलफल गरी व्यावहारिक, वस्तुनिष्ठ र कार्यान्वयनयोग्य सुझावहरू तयार पार्न आग्रह गरेको छ। संघीय निर्वाचनमा मुख्य भूमिका निर्वाह गरिसकेका स्थानीय समितिहरूलाई आफ्नो अनुभवका आधारमा सुझाव पेस गर्न भनिएको छ ।
