काठमाडौँ। सार्वजनिक सेवा प्रवाहमा बिचौलियाजन्य गतिविधि नियन्त्रण गर्न सञ्चालन गरिएको अभियान अन्तर्गत पछिल्लो एक महिनामा देशभर ४१७ जना व्यक्तिलाई नियन्त्रणमा लिइएको नेपाल प्रहरीले जनाएको छ ।
प्रहरी प्रधान कार्यालयका अनुसार पक्राउ परेकामध्ये काठमाडौँ उपत्यकाबाट १२३ जना रहेका छन् । यस्तै कोशी प्रदेशबाट ४५, मधेश प्रदेशबाट ५०, उपत्यकाबाहेक बागमती प्रदेशका जिल्लाबाट ७६, गण्डकी प्रदेशबाट २७, लुम्बिनी प्रदेशबाट ४४, कर्णाली प्रदेशबाट २४ र सुदूरपश्चिम प्रदेशबाट २८ जना पक्राउ परेका हुन् ।
प्रहरीले उपलब्ध गराएको विवरणअनुसार पक्राउ परेकामध्ये १२१ जनाविरुद्ध आवश्यक कानुनी प्रक्रिया अघि बढाउँदै मुद्दा दर्ता गरिएको छ भने बाँकी २९६ जनालाई प्रारम्भिक अनुसन्धानपछि छाडिएको छ ।
सरकारी तहबाट सार्वजनिक सेवा प्रणालीलाई बिचौलियामुक्त बनाउँदै नागरिकमैत्री, पारदर्शी तथा छिटो-छरितो सेवा सुनिश्चित गर्ने नीति अनुरूप विभिन्न सेवा प्रवाह केन्द्रहरूमा निगरानी र कारबाही तीव्र पारिएको प्रहरीले जनाएको छ ।
