काठमाडौँ । रुकुम पूर्वबाट रोल्पाको जलजलातर्फ तीर्थयात्री लिएर जाँदै गरेको जिप दुर्घटनामा परी २० जनाको ज्यान गएपछि सो क्षेत्रका राजनीतिक तथा संगठनात्मक कार्यक्रम शोक सभामा परिणत गर्दै समापन गरिएको छ।
नेकपा रुकुम पूर्वले आयोजना गरेको जिल्ला स्तरीय बैठक तथा प्रशिक्षण कार्यक्रमलाई दुर्घटनापछि श्रद्धाञ्जली सभामा रूपान्तरण गरिएको हो।
कार्यक्रममा पार्टीका संयोजक तथा रुकुम पूर्वबाट निर्वाचित प्रतिनिधिसभा सदस्य पुष्पकमल दाहाल ‘प्रचण्ड’ को उपस्थितिमा पूर्वनिर्धारित एजेन्डा स्थगित गर्दै शोक समर्पण गरिएको बताइएको छ।
बैठकले मृतकहरूप्रति गहिरो सम्मान प्रकट गर्दै शोकसन्तप्त परिवारप्रति समवेदना व्यक्त गर्ने निर्णय पारित गरेको छ। साथै, घटनाप्रति औपचारिक शोक प्रस्तावसमेत अनुमोदन गरिएको जनाइएको छ।
कार्यक्रममा सम्बोधन गर्दै दाहालले विपद्को यस्तो संवेदनशील अवस्थामा औपचारिक राजनीतिक गतिविधि निरन्तर राख्नु उपयुक्त नहुने भन्दै कार्यक्रम स्थगित गरिएको स्पष्ट पारे। उनले उद्धार तथा राहत कार्यलाई प्राथमिकतामा राखेर समन्वय भइरहेको पनि जानकारी दिए।
घटनास्थलको भौगोलिक कठिनाइका कारण उद्धार कार्य जटिल बनेको उल्लेख गर्दै उनले हिजोदेखि नै प्रधानमन्त्री कार्यालय, गृह प्रशासन तथा नेपाली सेनासँग निरन्तर सम्पर्क र समन्वयमार्फत उद्धार तथा शव व्यवस्थापनलाई प्रभावकारी बनाउन पहल भइरहेको बताए।
दाहालले दुर्घटनामा ज्यान गुमाउनेका परिवार, विशेष गरी बालबालिकाको संरक्षण र राहतका लागि राज्यका तर्फबाट आवश्यक सहयोग सुनिश्चित गर्न पहल गर्ने प्रतिबद्धता समेत व्यक्त गरेका छन्।
