काठमाडौँ। मुलुकका केही प्रदेशमा मौसम आंशिक बदली र कतिपय स्थानमा वर्षा भइरहेका बेला आगामी दुई दिनमा विशेष गरी सुदूरपश्चिम र लुम्बिनी प्रदेशका पहाडी तथा तराई भू-भागमा तापक्रम बढ्ने सम्भावना रहेको मौसमविद्ले अनुमान गरेका छन्।
जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार हाल कोशी, मधेस, बागमती र गण्डकी प्रदेशमा सामान्यदेखि आंशिक बदलीको अवस्था देखिएको छ भने अन्य पहाडी तथा हिमाली क्षेत्रमा आंशिक बादल छ।
महाशाखाले दिएको जानकारी अनुसार कोशी, बागमती र गण्डकी प्रदेशका केही स्थानमा मेघगर्जन र चट्याङसहित मध्यम स्तरको वर्षा भइरहेको छ।
भोलि बिहीबार र पर्सी शुक्रबार कोशी, बागमती र गण्डकी प्रदेशका पहाडी तथा हिमाली भूभागमा सामान्य बदली कायम रहने अनुमान गरिएको छ। त्यस्तै मधेस प्रदेश, बागमती र गण्डकी प्रदेशका तराई क्षेत्रसहित अन्य प्रदेशका पहाडी तथा हिमाली भूभागमा आंशिक बदली रहनेछ।
बाँकी तराई क्षेत्रहरूमा मौसम प्रायः सफा रहने सम्भावना रहेको महाशाखाले जनाएको छ। यसबिच, आगामी दुई दिन सुदूरपश्चिम र लुम्बिनी प्रदेशका तराई तथा पहाडी भूभागमा तापक्रम क्रमशः वृद्धि हुन सक्ने पूर्वानुमान समेत गरिएको छ।
