काठमाडौँ । नेपाल कम्युनिष्ट पार्टी (एमाले) ले व्यवसायी मीनबहादुर गुरुङ दम्पतीबाट प्रस्ताव गरिएको जग्गा तथा कार्यालय भवन सहयोग नलिने निर्णय गर्ने तयारी गरेको छ।
पार्टी सचिवालय बैठकमा प्रस्तुत प्रस्तावअनुसार गुरुङ दम्पतीले अनुदान स्वरूप उपलब्ध गराउने भनिएको भवन निर्माण सम्बन्धी प्रस्ताव धन्यवादसहित फिर्ता गर्ने उल्लेख गरिएको छ। एमालेले अब आफ्नै पहलमा मदननगर, बल्खुस्थित क्षेत्रमा केन्द्रीय कार्यालय भवन निर्माण गर्ने योजना अघि बढाउने भएको छ।
सचिवालयमा पेश गरिएको प्रस्तावमा कलंकी क्षेत्रमा भवन निर्माणको प्रस्ताव गर्ने दाताप्रति आभार व्यक्त गर्दै उक्त प्रस्ताव स्वीकार नगर्ने र बल्खुमै नयाँ कार्यालय निर्माण गर्ने निर्णय गर्न सुझाव दिइएको छ।
व्यवसायी गुरुङले उपलब्ध गराउने भनिएको भवनको शिलान्यास २०८१ असोजमा पार्टी अध्यक्ष केपी शर्मा ओली तथा गुरुङ दम्पतीको उपस्थितिमा गरिएको थियो। तर त्यसपछि निर्माण प्रक्रिया अगाडि बढ्न सकेको थिएन।
यसअघि मदन-आश्रित स्मृति दिवसको अवसरमा महासचिव शंकर पोखरेल ले बल्खु क्षेत्रमा नै केन्द्रीय कार्यालय निर्माण गरिने घोषणा गरेका थिए।
व्यवसायीबाट जग्गा तथा भवन सहयोग लिने निर्णय सार्वजनिक भएपछि एमालेभित्र आन्तरिक विवाद समेत उत्पन्न भएको थियो। सो विषयमा प्रश्न उठाउने नेतृहरू विन्दा पाण्डे र उषाकिरण तिम्सेनामाथि पार्टीले अनुशासनसम्बन्धी कारबाही गरेको थियो।
