पूर्वअर्थमन्त्री एवं नेपाली कम्युनिष्ट पार्टी (नेकपा) का नेता वर्षमान पुनले अर्थमन्त्री डा. स्वर्णिम वाग्लेद्वारा आगामी आर्थिक वर्षका लागि संघीय संसदमा शुक्रबार प्रस्तुत बजेटले तल्लो वर्गलाई उपेक्षा गरेको प्रतिक्रिया दिएका छन् । पुन वर्तमान संसदमा एक मात्र पूर्वअर्थमन्त्री हुन् ।
बजेट सार्वजनिक भएपछि सञ्चारकर्मीसँग कुरा गर्दै उनले किसान, मजदुर, नवयुवा, तल्लो वर्ग र सुकुम्बासीका लागि बजेटमा आशालाग्दा कार्यक्रम समावेश नगरिएको टिप्पणी गरे । बजेटमा राज्यका तर्फबाट रोजगारी सिर्जना गर्ने विषयलाई उपेक्षा गरिएको उनको भनाइ थियो ।
‘समग्रमा मध्यम वर्ग केन्द्रित बजेट आएको छ । तत्लो वर्गका लागि लक्षित कार्यक्रम छैनन्’, पुनले भने, ‘मजदुर, किसान, बेरोजगार नवयुवा र सुकुमबासीहरुका लागि कुनै सम्बोधन गरिएन । रोजगारी सिर्जना गर्ने वा स्वरोजगार बनाउने कार्यक्रम नै छैनन् । रोजगारी दिने जिम्मेवारी सबै निजी क्षेत्रको हो भनेर पन्छिन खोजेजस्तो देखिन्छ ।’
पुनले नेपाल टेलिकम र नेपाल वायु सेवा निगमजस्ता नाफामा सञ्चालित सार्वजनिक संस्थानलाई निजीकरण गर्ने नीति लिएकोमा आलोचना गरे । ‘नाफामा चलिरहेका कम्पनीको शेयर बिक्री गर्ने भनेको निजीकरणतिर लानु हो, यो ठीक छैन’, पुनले भने ।
सरकारको नेतृत्वकर्ता रास्वपाले पुराना दलमाथि मुलुकलाई ऋणको पासोमा पारेको आरोप लगाउँदै आएको भन्दै बजेटको स्रोतका रूपमा आन्तरिक र वैदेशिक ऋण लिने विषय उल्लेख रहेको बताए । अर्थमन्त्री ४ खर्ब आन्तरिक र २ खर्बभन्दा बढी वैदेशिक ऋणबाट स्रोत जुटाउने योजनामा रहेको उनको भनाइ थियो ।
‘रास्वपाका साथीहरू स्थापित पार्टीहरूले ऋण बढी लिएर देश डुबाए, जनताको टाउकोमा ऋणको भारी थपे भन्नुहुन्थ्यो’, पुनले भने, ‘अर्थमन्त्रीले खर्ब ११ अर्ब आन्तरिक र २ खर्बभन्दा बढी बाह्य ऋण लिने कुरा गर्नुभएको छ ।’
पुनले आफूले आर्थिक वर्ष २०८०/०८१ को बजेटमा समावेश गरेका गण्डकी त्रिभुजलाई चतुर्भुज, कर्णालीलाई जडिबुटीको हब बनाउने भनेकामा कर्णाली चुर्तुज तथा सुदूरपश्चिमलाई धार्मिक पर्यटन हब बनाउने योजनालाई धार्मिक चतुर्भुज नामकरण गरी बजेटमा ल्याएकामा धन्यवाद दिए ।
