काठमाडौँ । नेपाल राष्ट्र बैंकले आगामी मौद्रिक नीति सरकारको बजेट कार्यान्वयनलाई सहयोग पुग्ने ढंगले तयार गरिने जनाएको छ।
नेपाल आर्थिक पत्रकार संघ (नाफिज) ले नबिल बैंकको सहकार्यमा आयोजना गरेको ‘डिकोडिङ मोर्डन बैंकिङ फर इकोनोमिक जर्नालिस्ट्स’ कार्यक्रमलाई सम्बोधन गर्दै राष्ट्र बैंकका कार्यकारी निर्देशक तथा प्रवक्ता गुरुप्रसाद पौडेलले मौद्रिक नीतिले आर्थिक गतिविधिलाई थप चलायमान बनाउने र बजेटका प्राथमिकतालाई सघाउने गरी व्यवस्था समेट्ने जानकारी दिए।
उनले बैंक तथा वित्तीय संस्थाहरूको गैरबैंकिङ सम्पत्तिको प्रभावकारी व्यवस्थापनका लागि एसेट म्यानेजमेन्ट कम्पनी स्थापना हुनेमा आशावादी रहेको बताए। सरकारले निश्चित समयसीमा निर्धारण गरेर प्रक्रिया अघि बढाउने संकेत गरिसकेकाले चालु वर्षमै यस्तो कम्पनी स्थापना हुने अपेक्षा उनले व्यक्त गरे।
प्रवक्ता पौडेलका अनुसार अहिले बैंकिङ प्रणालीमा पर्याप्त तरलता रहेको छ भने ब्याजदर पनि निरन्तर घट्दो क्रममा छ। तरलताको सन्तुलित व्यवस्थापन तथा ब्याजदरलाई निश्चित सीमाभित्र कायम राख्न नेपाल राष्ट्र बैंकले खुला बजार उपकरणमार्फत ठुलो परिमाणमा स्रोत परिचालन गरिरहेको उनले बताए।
उनले बैंक तथा वित्तीय संस्थासँग कर्जा विस्तार गर्ने पर्याप्त क्षमता भए पनि निजी क्षेत्रबाट अपेक्षित माग नबढेकाले ऋण प्रवाहले गति लिन नसकेको उल्लेख गरे।
साथै, साना तथा उत्पादनमुखी क्षेत्रतर्फ कर्जा प्रवाह बढाउन राष्ट्र बैंकले विशेष प्राथमिकता दिएको जानकारी दिँदै उनले १० लाख रुपैयाँसम्मका कर्जाको मूल्यांकन सम्बन्धित बैंक तथा वित्तीय संस्थाले आफ्नै प्रक्रियामार्फत गरी सहज रूपमा प्रवाह गर्न सक्ने व्यवस्था गरिएको बताए।
