काठमाडौँ । अतिरिक्त समयको अन्तिम मिनेटमा युरी टिलेमान्सले पेनाल्टीमार्फत गोल गरेपछि दुई गोलको सहज अग्रता उल्टाउँदै बेल्जियम फिफा विश्वकप २०२६ को अन्तिम १६ मा प्रवेश गरेको छ ।
अमेरिकाको सियाटलमा बुधबार राति भएको रोमाञ्चक र नाटकीय नकआउट खेलमा बेल्जियमले सेनेगललाई ३–२ गोल अन्तरले पराजित गर्यो । निर्धारित ९० मिनेटको खेल २–२ गोलको बराबरीमा सकिएपछि खेल अतिरिक्त समयमा धकेलिएको थियो ।
खेलको ८५औँ मिनेटसम्म २–० ले पछि परेको रुडी गार्सियाको टोली बेल्जियमले खेल सकिन ४ मिनेट बाँकी छँदा अविश्वसनीय पुनरागमन गरेको हो । खेलमा सुरुवाती वर्चस्व जमाएको सेनेगलका लागि २५औँ मिनेटमा हबिब डिएरा र ५१औँ मिनेटमा इस्माइला सारले गोल गर्दै टोलीलाई २–० को बलियो स्थितिमा पुर्याएका थिए ।
तर, दोस्रो हाफमा मैदान छिरेका बेल्जियमका भेट्रान स्ट्राइकर रोमेलु लुकाकु खेलको ‘टर्निङ प्वाइन्ट’ बने । चोटका कारण पछिल्लो सिजन क्लब फुटबलमा संघर्ष गरेका ३३ वर्षीय लुकाकुले ८६औँ मिनेटमा थोमस मुनिएरको क्रसलाई उत्कृष्ट फ्लिक गर्दै गोल गरेर बेल्जियमलाई खेलमा फर्काए । त्यसको तीन मिनेट नबित्दै कप्तान टिलेमान्सले हेडरमार्फत गोल गर्दै खेललाई २–२ को बराबरीमा ल्याए र बेल्जियमलाई नयाँ जीवन दिए । खेलको दोस्रो हाफमा टिलेमान्स र ट्रोसार्डबीच मैदानमै भनाभन समेत भएको थियो, जसलाई लुकाकुले साम्य पारेका थिए ।
अतिरिक्त समयको पनि अन्तिम क्षण अर्थात् १२५औँ मिनेटमा खेलले थप नाटकीय मोड लियो । भिडियो असिस्टेन्ट रेफ्रीको करिब ७ मिनेट लामो रिभ्युपछि बेल्जियमले पेनाल्टीको अवसर पायो, जसलाई एस्टन भिल्लाका मिडफिल्डर टिलेमान्सले सहजै गोलमा परिणत गर्दै बेल्जियमको जित निश्चित गरे ।
यो जितसँगै बेल्जियमले जुलाई ७ मा हुने अन्तिम १६ को खेलमा अमेरिका वा बोस्निया-हर्जगोभिनाको सामना गर्नेछ भने अफ्रिकी च्याम्पियन सेनेगलको विश्वकप यात्रामा पूर्णविराम लागेको छ ।
