ढाका । बङ्गलादेशमा नयाँ राष्ट्रपति चयनको प्रक्रिया सेप्टेम्बरमा अघि बढ्ने भएको छ। संविधानअनुसार राष्ट्रपतिको पद रिक्त भएपछि ९० दिनभित्र नयाँ राष्ट्रपति निर्वाचित गर्नुपर्ने व्यवस्था रहेकाले संसद्को आगामी अधिवेशनबाट नयाँ राष्ट्रपतिको निर्वाचन गरिने कानुनमन्त्री मो. असादुज्जामानले बताएका छन्।
उनका अनुसार संसद्को दोस्रो अधिवेशन जुलाई १५ मा समाप्त भएको थियो र संविधानबमोजिम तेस्रो अधिवेशन दुई महिनाभित्र, अर्थात् सेप्टेम्बर १४ सम्म आह्वान गर्नुपर्नेछ। सोही अधिवेशनमा राष्ट्रपतिको निर्वाचन हुने अपेक्षा गरिएको छ।
संसद् सचिवालयले सभामुख हाफिज उद्दिन अहमदले राष्ट्रपति मोहम्मद शहाबुद्दिन चुप्पुको राजीनामापछि संविधानअनुसार राष्ट्रपतिको जिम्मेवारी सम्हालिरहेको पुष्टि गरेको छ।
राष्ट्रपतिका प्रेस सचिव मोहम्मद सरवार आलमका अनुसार शहाबुद्दिनले स्वास्थ्य अवस्था गम्भीर बनेको उल्लेख गर्दै सभामुखसमक्ष राजीनामा बुझाएका हुन्।
बङ्गलादेशको संविधानअनुसार संसद्का सदस्यहरू नै राष्ट्रपतिको निर्वाचनका मतदाता हुन्छन्। हाल प्रधानमन्त्री तारिक रहमान नेतृत्वको बङ्गलादेश नेशनलिस्ट पार्टी (बीएनपी) को संसद्मा स्पष्ट बहुमत रहेकाले उक्त दलका उम्मेदवार नै देशको अर्को राष्ट्रपति बन्ने सम्भावना बलियो मानिएको छ।
