काठमाडौं । नेपाली कांग्रेसका पूर्वसभापति शेरबहादुर देउवाले पछिल्ला केही दिनयता मधेशका विभिन्न क्षेत्रमा देखिएको तनावपूर्ण अवस्थाप्रति गम्भीर चासो व्यक्त गर्दै सबै पक्षलाई संयमता अपनाउन र सामाजिक सद्भाव कायम राख्न आग्रह गरेका छन्।
बिहीबार सामाजिक सञ्जालमार्फत आफ्नो धारणा सार्वजनिक गर्दै देउवाले नेपालको पहिचान आपसी सहअस्तित्व, सद्भाव, एकता र सहकार्यमा आधारित रहेको उल्लेख गरे। उनले यही मूल्य र परम्परालाई जोगाउन सबै नागरिकले जिम्मेवार भूमिका निर्वाह गर्नुपर्नेमा जोड दिएका छन्।
उनले सम्पूर्ण दाजुभाइ तथा दिदीबहिनीलाई शान्ति, एकता र सहकार्यको भावनालाई आत्मसात् गर्दै धैर्य र संयमता अपनाउन हार्दिक अनुरोध गरेका छन्।
देउवाले पछिल्ला घटनामा ज्यान गुमाएकाप्रति श्रद्धाञ्जलि अर्पण गर्दै शोकाकुल परिवारजनप्रति गहिरो समवेदना व्यक्त गरेका छन्। साथै, घाइतेहरूको शीघ्र स्वास्थ्यलाभको कामनासमेत गरेका छन्।
तनाव थप फैलिन नदिन सरकारले सबै राजनीतिक दलसँग समन्वय र सहकार्य गर्दै तत्काल प्रभावकारी पहल गर्नुपर्ने उनको भनाइ छ। संवाद, सहकार्य र जिम्मेवार राजनीतिक पहलमार्फत वर्तमान परिस्थितिको समाधान खोज्नुपर्नेमा उनले जोड दिएका छन्।
पछिल्ला केही दिनयता तराई–मधेशका विभिन्न जिल्लामा भएका घटनापछि तनाव बढेको छ। यसबीच विभिन्न राजनीतिक दलका नेताहरूले पनि शान्ति, सामाजिक सद्भाव र संवादमार्फत समस्याको समाधान खोज्नुपर्ने आवश्यकता औंल्याउँदै आएका छन्।
