मस्को । दक्षिणी रुसको व्यस्त समुद्री तटमा ड्रोन खस्दा तीन बालबालिकासहित सात जनाको मृत्यु भएको छ भने ४० जना घाइते भएका छन् । क्रास्नोडार क्षेत्रका गभर्नर भेनियामिन कोन्द्रात्येभका अनुसार घाइतेमध्ये १७ जनाको अस्पतालमा उपचार भइरहेको छ।
सामाजिक सञ्जालको भिडियोमा ड्रोन चट्टानतर्फ उड्दै गएपछि समुद्री तटमा ठोक्किएर विस्फोट भएको देखिन्छ। घटनाका बेला समुद्र किनार र पानीमा रहेका पर्यटकहरूमा भागदौड मच्चिएको थियो।
रुसी अधिकारीहरूले युक्रेनमाथि नागरिकलाई लक्षित गरेर जानाजानी आक्रमण गरेको आरोप लगाएका छन्। युक्रेनले भने घटनाबारे कुनै प्रतिक्रिया दिएको छैन। दुवै पक्षले नागरिकलाई नियतवश निशाना नबनाउने दाबी गर्दै आएका छन्।
ड्रोनको वास्तविक लक्ष्य के थियो भन्ने अझै स्पष्ट भएको छैन। केही युक्रेनी टेलिग्राम च्यानलहरूले विद्युतीय अवरोधका कारण ड्रोनको सिग्नल अवरुद्ध भएपछि समुद्री तटमा खसेको दाबी गरेका छन् ।
त्यक्षदर्शीहरूका अनुसार विष्फोटअघि गोली चलेको आवाज सुनिएको थियो, जसले रुसी हवाई प्रतिरक्षा प्रणालीले ड्रोन खसाल्ने प्रयास गरेको हुन सक्ने संकेत गर्छ।
घटना ब्ल्याक सी किनारस्थित आर्खिपो–ओसिपोभ्का गाउँ नजिकको समुद्री तटमा भएको हो। यो क्षेत्र रुसी पर्यटकहरूको लोकप्रिय गन्तव्य मानिन्छ।
युक्रेनले पछिल्लो एक वर्षयता रुसभित्र ऊर्जा पूर्वाधार र सैन्य प्रयोजनमा प्रयोग हुने गोदामहरूमा लामो दूरीका ड्रोन आक्रमण तीव्र बनाएको छ। यस्ता आक्रमणमा पछिल्लो सप्ताहन्त मात्रै रुसका विभिन्न सहरमा आठ नागरिकको मृत्यु भएको थियो।
