काठमाडौं। संसद् बैठकमा सांसदहरूको उपस्थिति पातलिँदै गएको र बैठक सुरु भएपछि बीचैमा छाडेर हिँड्ने प्रवृत्ति बढेको भन्दै राष्ट्रिय स्वतन्त्र पार्टी (रास्वपा) ले आफ्ना सांसदहरूको हाजिरी विश्लेषण गर्ने भएको छ।
सांसदहरूको यस्तो व्यवहारले संसद्को गरिमा र प्रभावकारिता कमजोर बन्दै गएको निष्कर्ष निकाल्दै रास्वपा संसदीय दलले विगतका केही निश्चित बैठकहरूको हाजिरी विवरण संकलन गरी विस्तृत अध्ययन सुरु गरेको हो।
रास्वपा संसदीय दलका मुख्य सचेतक कविन्द्र बुर्लाकोटीका अनुसार २०८३ असार ३० र ३१ गते तथा साउन १४, १८ र २२ गते बसेका संसद् बैठकहरूको उपस्थिति हाजिरी संसद् सचिवालयबाट झिकाएर विश्लेषण गर्न लागिएको छ।
यसका लागि रास्वपा संसदीय दलका सचेतकद्वय प्रकाशचन्द्र परियार र क्रान्तिशिखा धिताललाई अध्ययन गरी ७ दिनभित्र प्रतिवेदन पेश गर्ने जिम्मेवारी दिइएको छ।
मुख्य सचेतक बुर्लाकोटीले संसद्लाई मर्यादित, उत्तरदायी र प्रभावकारी बनाउन तथा सांसदहरूको उपस्थिति सुनिश्चित गराउन यो कदम चालिएको बताएका छन्। प्रतिवेदन प्राप्त भएपछि प्राप्त निष्कर्षका आधारमा संसदीय दलले आवश्यक निर्णय लिने बताइएको छ।
