कैलाली-कैलालीको बर्दगोरिया गाउँपालिका–१ मुडा पुल नजिकै ट्रकको ठक्करबाट नेपाल कम्युनिष्ट पार्टी (एमाले) सुदूरपश्चिम प्रदेश कमिटी सल्लाहकार समिति सदस्य सावित्रा सापकोटाको निधन भएको छ।
सोमबार बिहान बर्दगोरिया–१ स्थित मुडा पुल नजिकै सापकोटा सवार से १–०१–००१ ख नम्बरको स्कुटरलाई विपरीत दिशाबाट आउँदै गरेको लु १–०१–०१० प ००४५ नम्बरको ट्रकले ठक्कर दिएको थियो। दुर्घटनामा परेर गम्भीर घाइते हुनुभएकी नेत्री सापकोटालाई तत्काल उपचारका लागि दोदोधरा अस्पताल लगिएकोमा चिकित्सकले मृत घोषणा गरेका थिए।
इलाका प्रहरी कार्यालय बौनियाका प्रहरी निरीक्षक डम्बर विष्टका अनुसार दुर्घटनामा संलग्न ट्रक र चालक नवलपरासी बर्दघाट बस्ने २६ वर्षीय दिनेश गिरीलाई महेन्द्र राजमार्गअन्तर्गत बर्दगोरिया र लम्कीचुहा नगरपालिकाको सीमा क्षेत्रबाट नियन्त्रणमा लिइएको छ। घटनाबारे थप अनुसन्धान भइरहेको प्रहरीले जनाएको छ।
निधन हुनुभएकी नेत्री सापकोटा २०७४ सालको स्थानीय तह निर्वाचनमा बर्दगोरिया गाउँपालिकाको उपाध्यक्ष पदका लागि एमालेबाट उम्मेदवारसमेत बन्नुभएको थियो। उनको निधनले पार्टी र स्थानीय क्षेत्रमा गहिरो शोक छाएको छ।
