काठमाडौं । सत्तारुढ राष्ट्रिय स्वतन्त्र पार्टी (रास्वपा) को केन्द्रीय समिति बैठकले पार्टीका विभिन्न विभागका प्रमुख तथा प्रवक्ताको टुंगो लगाएको छ। बनस्थलीस्थित पार्टी केन्द्रीय कार्यालयमा जारी बैठकले विभाग प्रमुखहरू मनोनयन गरेको हो।
बैठकले संगठन विभाग प्रमुखमा प्रमोद न्यौपानेलाई जिम्मेवारी दिएको छ।
त्यस्तै, सार्वजनिक सेवा तथा जनगुनासो विभाग प्रमुखमा विजय जैरु, जनस्वास्थ्य विभागमा डा. तोसिमा कार्की, पूर्वाधार विभागमा निशा डाँगी, अन्तर्राष्ट्रिय तथा कूटनीतिक विभागमा परराष्ट्रमन्त्रीसमेत रहेका शिशिर खनाल र अर्थ विभागमा लीमा अधिकारीलाई जिम्मेवारी दिइएको छ।
यसैगरी, बैठकले पार्टीको प्रवक्ताको जिम्मेवारी पूर्वमन्त्री जगदीश खरेललाई दिने निर्णय गरेको छ।
रास्वपाले यसअघि पहिलो महाधिवेशनबाट ९९ जना केन्द्रीय सदस्य निर्वाचित गरेको थियो।
