काठमाडौं । राष्ट्रिय स्वतन्त्र पार्टी (रास्वपा) ले केन्द्रीय सचिवालय विस्तार गरेको छ। शुक्रबार बसेको पार्टीको केन्द्रीय समिति बैठकले सचिवालयमा ११ जना सदस्य मनोनयन गरेको हो।
पार्टीका एक सदस्यका अनुसार सचिवालय सदस्यमा शिशिर खनाल, गणेश पराजुली, विराजभक्त श्रेष्ठ, कविन्द्र बुर्लाकोटी, लिमा अधिकारी, दीपक बोहरा, समीक्षा बास्कोटा, शिव नेपाली, इन्दिरा राना मगर, मनिष झा र पुरुषोत्तम यादवलाई मनोनयन गरिएको छ।
बैठकले जगदिश खरेललाई पार्टी प्रवक्ता र डा. मनोहर प्रधानलाई कोषाध्यक्षको जिम्मेवारीसमेत दिएको छ।
रास्वपाको विधानमा पदाधिकारीसहित थप सदस्यलाई केन्द्रीय सचिवालयमा मनोनयन गर्न सकिने व्यवस्था छ। सोही व्यवस्थाअनुसार सचिवालय विस्तार गरिएको हो।
यसअघि पार्टीको पहिलो केन्द्रीय समिति बैठकले निर्वाचित पदाधिकारी सम्मिलित सचिवालय गठन गरेको थियो। त्यसमा सभापति रवि लामिछाने, उपसभापति स्वर्णिम वाग्ले र सोबिता गौतम, महामन्त्री विपिनकुमार आचार्य तथा सहमहामन्त्री असिम शाह, हरि ढकाल र निशा डाँगी रहेका थिए।
११ जना नयाँ सदस्य थपिएसँगै रास्वपाको केन्द्रीय सचिवालय १८ सदस्यीय बनेको छ।
