काठमाडौं । राष्ट्रिय प्रजातन्त्र पार्टी (राप्रपा) ले बागमती प्रदेश सरकारमा मन्त्री बनेका आफ्ना तीन सांसदलाई कारबाही नगर्नुपर्ने कारणसहित १२ घण्टाभित्र स्पष्टीकरण दिन निर्देशन दिएको छ।
राप्रपा प्रवक्ता मोहनकुमार श्रेष्ठले जारी गरेको विज्ञप्तिमा पार्टीको निर्णयविपरीत एमाले र नेकपा गठबन्धन नेतृत्वको बागमती प्रदेश सरकारमा सहभागी भएको भन्दै सांसदहरू राजु विष्ट, राजेन्द्र प्रजापति र गीरबहादुर तामाङसँग स्पष्टीकरण मागिएको उल्लेख छ।
राप्रपाको केन्द्रीय कार्यसम्पादन समितिले यसअघि नै बागमती प्रदेशसभा संसदीय दलका नेता उद्धव थापालाई पार्टीको साधारण सदस्यसमेत नरहने गरी कारबाही गरिसकेको छ। थापाले आफ्नो व्यक्तिगत लेटरप्याड प्रयोग गर्दै बागमती सरकारलाई पार्टीको तर्फबाट समर्थन रहेको जनाएका थिए।
सोही आधारमा एमाले र नेकपा गठबन्धनबाट बागमती प्रदेशका मुख्यमन्त्री बनेका किरण थापाले राप्रपाका तीन सांसदलाई मन्त्री नियुक्त गरेका थिए।
राप्रपाले भने पार्टीको निर्णय र निर्देशनविपरीत मन्त्री पदको शपथ लिएको भन्दै राजु विष्ट, राजेन्द्र प्रजापति र गीरबहादुर तामाङलाई स्पष्टीकरण सोधेको हो।
प्रवक्ता श्रेष्ठका अनुसार केन्द्रीय अनुशासन समितिले उनीहरूलाई ‘किन कारबाही नगर्ने’ भन्ने विषयमा १२ घण्टाभित्र स्पष्ट जवाफ पेश गर्न समय दिएको छ।
