सप्तरी- सप्तरीको शम्भुनाथ नगरपालिका वडा नम्बर–३ मा ३ वर्षीया बालिका रहस्यमय परिस्थितिमा मृत अवस्थामा फेला परेकी छन्। स्थानीय इरफानकी ३ वर्षीया छोरी सानिया खातुन आइतबार बिहान आफ्नै घरपछाडिको झाडीमा मृत अवस्थामा भेटिएकी हुन्।
परिवारका अनुसार बालिका आइतबार बिहान करिब ९ बजेसम्म घरमै खेलिरहेकी थिइन्। त्यसपछि एक्कासि सम्पर्कविहीन भएकी उनको खोजी गर्ने क्रममा घरदेखि करिब ६० मिटर पछाडिको झाडीमा शव फेला परेको थियो।
घटनाको जानकारी पाउनासाथ प्रहरी टोली घटनास्थल पुगेर अनुसन्धान सुरु गरेको छ। जिल्ला प्रहरी कार्यालय सप्तरीका प्रमुख प्रहरी उपरीक्षक रूपक खड्काका अनुसार बालिकाको मृत्युको कारण अझै खुल्न सकेको छैन र घटनाको गम्भीरतापूर्वक छानबिन भइरहेको छ।
अकल्पनीय रूपमा बालिकाको शव भेटिएपछि घटनास्थलमा स्थानीयहरूको बाक्लो भिड लागेको छ भने परिवार र सिङ्गो बस्ती शोकमा डुबेको छ। प्रहरीले शव पोस्टमार्टम तथा अन्य कानुनी प्रक्रिया अगाडि बढाएको जनाएको छ।
