काठमाडौं । नेकपा (एमाले)का अध्यक्ष केपी शर्मा ओलीले ‘पार्टी पुनर्गठन’को नाममा आफूलाई अध्यक्ष पदबाट हटाउने अभियान चलाइएको आरोप लगाएका छन् । उनले पार्टी पुनर्गठनको आवश्यकता अहिले नरहेको भन्दै त्यस्तो प्रचारबाट भ्रमित नहुन कार्यकर्तालाई आग्रह गरेका छन् ।
अखिल नेपाल महिला संघ कोशी प्रदेशको दोस्रो सम्मेलनलाई आइतबार भर्चुअल सम्बोधन गर्दै ओलीले पार्टीमा गम्भीर संकट उत्पन्न भएका बेला मात्रै पुनर्गठन हुने गरेको बताए । उनले विगतमा २०१९, २०२८ र २०७७ सालमा कम्युनिस्ट आन्दोलनमा उत्पन्न विशेष परिस्थितिका कारण पार्टी पुनर्गठन गरिएको स्मरण गरे ।
‘पार्टी पुनर्गठन’ शब्दको दुरुपयोग गरेर अध्यक्ष हटाउने अभियान चलाइएको उनको आरोप थियो । अध्यक्ष हटाउने विषयलाई पार्टी पुनर्गठनसँग जोड्न नमिल्ने भन्दै ओलीले नेतृत्व परिवर्तनका लागि निश्चित प्रक्रिया र समय हुने बताए ।
विशेष महाधिवेशन वा प्रतिनिधि परिषद् बैठकको मागप्रति संकेत गर्दै उनले नेतृत्वका विषयमा उठाइएका यस्ता मागलाई ‘बेमौसमी बाजा’को संज्ञा दिए । कुनै पनि विषयमा आफ्नो धारणा राख्ने उपयुक्त समय र प्रक्रिया हुने भन्दै उनले पार्टीभित्र स्वेच्छाचारी ढंगले धारणा राख्ने प्रवृत्ति स्वीकार्य नहुने बताए ।
ओलीले वर्तमान सरकार देशमा डर, त्रास र भयको वातावरण सिर्जना गर्दै स्वेच्छाचारी ढंगले अघि बढिरहेको आरोप पनि लगाए । उनले सरकार फासीवादतर्फ उन्मुख भएको दाबी गर्दै जनताले दिएको बहुमत देशमा आतंक सिर्जना गर्न नभई सुशासनका लागि भएको बताए ।
उनका अनुसार एमालेको अहिलेको मुख्य जिम्मेवारी देशलाई ‘प्रतिगमन’बाट संवैधानिक बाटोमा फर्काउनु हो । त्यसका लागि पार्टीलाई वैचारिक र सांगठनिक रूपमा बलियो बनाउँदै आन्दोलनमा सहकार्य गर्न सक्ने सबै शक्तिलाई साथमा लिएर अघि बढ्नुपर्ने उनले बताए ।
गत फागुन २१ गतेको निर्वाचनमा एमालेले धक्का बेहोरेको स्वीकार गर्दै ओलीले त्यसका कारण पार्टीको राजनीतिक आन्दोलन कमजोर नहुने दाबी गरे । उनले पार्टीभित्रका कमजोरी पहिचान गरी सुधार गर्नुपर्ने आवश्यकता औंल्याउँदै भने, ‘पार्टी नबदल्ने, भोट बदल्ने, त्योभन्दा लज्जाजनक कुरा के हुन्छ ?’
प्रतिगमनविरुद्धको आन्दोलनलाई सफल बनाउन पार्टीलाई एकताबद्ध र सक्रिय बनाउनुपर्नेमा जोड दिँदै ओलीले आगामी स्थानीय तहको निर्वाचनलाई लक्षित गरेर तयारीमा जुट्न कार्यकर्तालाई निर्देशन दिए ।
उनले सामाजिक सञ्जाललगायतका माध्यमलाई पार्टीको हितमा प्रभावकारी रूपमा प्रयोग गर्न तथा निराशा र हतोत्साह त्यागेर उच्च मनोबलका साथ पार्टी काममा सक्रिय हुन कार्यकर्तालाई आग्रह गरे ।
ओलीले एमालेको अन्तिम राजनीतिक गन्तव्य समाजवाद भएको पनि बताए । साम्यवाद परिकल्पना भए पनि समाजवाद आफ्नै समयमा हासिल गर्न सकिने यथार्थ लक्ष्य भएको उनको भनाइ थियो । ‘समृद्ध नेपाल, सुखी नेपाली’को गन्तव्य पनि समाजवाद नै भएको उनले दाबी गरे ।
