काठमाडौं । सर्वोच्च अदालतले अभियन्ता दुर्गा प्रसाईंको घरमा खानतलासीका क्रममा बरामद भएका सामग्रीसहित अदालतमा उपस्थित हुन विपक्षीका नाममा आदेश जारी गरेको छ।
सोमबार न्यायाधीश नृपध्वज निरौलाको इजलासले प्रसाईंले दायर गरेको रिटमाथि सुनुवाइ गर्दै यस्तो आदेश दिएको हो। अदालतले प्रसाईंलाई घरबाहिर हिँडडुल गर्न नदिएको विषयमा समेत कारणसहितको लिखित जवाफ २४ घण्टाभित्र पेस गर्न भनेको छ।
सर्वोच्चले मिति २०८३ भदौ ४ गते प्रसाईंको घरमा गरिएको खानतलासीका क्रममा बरामद भएका भनिएका सामग्रीसमेत पेसीका दिन अदालतमा पेस गर्न जिल्ला प्रहरी परिसर भक्तपुरलाई आदेश दिएको छ।
आदेशमा भनिएको छ, ‘आदेश जारी हुन नपर्ने भए सोको आधार र कारण खुलाई यो आदेश प्राप्त भएका मितिले बाटाको म्यादबाहेक २४ घण्टाभित्र महान्यायाधिवक्ताको कार्यालयमार्फत लिखित जवाफ पेस गर्नू।’
त्यस्तै, निवेदनसाथ संलग्न खानतलासी पूर्जीअनुसार प्रसाईंको घरबाट बरामद भएका सामानसमेत पेसीका दिन लिएर आउन जिल्ला प्रहरी परिसर भक्तपुरलाई लेखी पठाउन सर्वोच्चले आदेश दिएको छ।
