चितवन । प्राकृतिक विपत्तिले निम्त्याएको दुःखद् परिस्थितिका बीच चितवनमा मानव संवेदनालाई नै स्तब्ध पार्ने घटना सार्वजनिक भएको छ। रसुवामा आएको भीषण बाढीमा परी ज्यान गुमाएका तथा बाढीले बगाएर ल्याएका शवबाट सुनका मुन्द्रा लुट्ने दुई जनालाई चितवन प्रहरीले पक्राउ गरेको छ।
शवबाट कानका मुन्द्रा जबर्जस्ती तानिरहेको भिडियो सामाजिक सञ्जालमा भाइरल भएपछि प्रहरीले घटनाबारे अनुसन्धान अघि बढाएको थियो। भिडियोका आधारमा पहिचान गरी उनीहरूलाई बिहीबार दिउँसो पक्राउ गरिएको चितवनका प्रहरी प्रमुख प्रहरी उपरीक्षक (एसपी) रामेश्वर पौडेलले जानकारी दिए।
पक्राउ पर्नेमा नवलपरासीको विनय त्रिवेणी नगरपालिका–१ घर भई हाल भरतपुर महानगरपालिका–१ लीलाचोकस्थित मामाघरमा बस्दै आएका २५ वर्षीय मदन गुरुङ र सुनसरीको चाँदबेला नगरपालिका–५ घर भई हाल भरतपुर महानगरपालिका–२ पोखरा बसपार्कस्थित सुपारी टोलमा बस्दै आएका ३८ वर्षीय उमेश चौधरी रहेका छन्।
बाढीका कारण ठूलो जनधनको क्षति भइरहेको र पीडित परिवार शोकमा रहेका बेला मृतकको शवबाटै गरगहना लुटिएको घटनाप्रति सर्वत्र आक्रोश र निन्दा भइरहेको छ।
प्रहरीले पक्राउ परेका दुवै जनालाई नियन्त्रणमा राखी घटनाबारे थप अनुसन्धान गरिरहेको जनाएको छ। उनीहरूमाथि प्रचलित कानुनअनुसार कडा कारबाही गरिने प्रहरीले जनाएको छ।
