काठमाडौँ । रसुवाको भोटेकोशी नदीमा आएको विनाशकारी बाढीपछि प्रभावित विभिन्न आठ जिल्लामा हालसम्म ४६९ जनाको शव फेला परेको छ। नेपाल प्रहरीले शुक्रबार बिहान सार्वजनिक गरेको पछिल्लो विवरणअनुसार बाढीबाट ठूलो जनधनको क्षति भएको छ।
प्रहरीका अनुसार बाढीले बगाएर ल्याएका शव रसुवासहित तल्लो तटीय क्षेत्रका विभिन्न जिल्लामा फेला परेका हुन्। सबैभन्दा धेरै चितवनमा १७८ र नवलपरासी (पूर्व) मा ११० शव भेटिएका छन्।
यस्तै, गोरखामा ४४, नुवाकोटमा ३७, धादिङमा ३३, तनहुँमा २८, नवलपरासी (पश्चिम) मा २७ र रसुवामा १२ जनाको शव फेला परेको प्रहरीले जनाएको छ।
बाढी प्रभावित क्षेत्रबाट हालसम्म १ हजार ५४५ जना घाइते तथा जोखिममा परेका नागरिकको उद्धार गरिएको छ। उद्धार गरिएकामध्ये नुवाकोटबाट ८९८, रसुवाबाट ६४४ र धादिङबाट तीन जना रहेका छन्।
उद्धार गरिएकामध्ये ८४ जना घाइतेको काठमाडौँ उपत्यकाका विभिन्न अस्पतालमा उपचार भइरहेको छ। केही घाइते भने उपचारपछि डिस्चार्ज भइसकेका छन्।
बाढीपछि जारी खोज तथा उद्धार अभियानमा ४ हजार ३४८ जना प्रहरी कर्मचारी परिचालन गरिएको नेपाल प्रहरीले जनाएको छ। बाढीका कारण २८ जना प्रहरी कर्मचारी अझै सम्पर्कविहीन छन्। उनीहरूको खोजी कार्यलाई तीव्र पारिएको प्रहरीले जनाएको छ।
