धादिङ- आज बिहान केहीबेर अवरुद्ध भएर पुनः खुलेको काठमाडौं-मुग्लिन सडक खण्ड त्रिशूली नदीको कटानका कारण फेरि पूर्ण रूपमा बन्द भएको छ।
रसुवाको भोटेकोशी हुँदै आएको भीषण बाढीका कारण त्रिशूली नदीमा जलसतह अत्यधिक बढेपछि सडक अवरुद्ध हुन पुगेको हो।
सडक भासियो, यात्रुहरू अलपत्र धादिङकी प्रमुख जिल्ला अधिकारी लक्ष्मी पाण्डेय (गौतम)का अनुसार त्रिशूली नदीको तीव्र बहावले तलबाट सडक कटान गरेपछि सडकको केही भाग भासिएको छ।
सडकको जगैदेखि कटान सुरु भएकाले सवारी साधन आवतजावत गराउन नसकिने गरी जोखिम बढेपछि यातायात पूर्ण रूपमा ठप्प पारिएको हो।
बिहान केही समयका लागि खुलेको सडक लगत्तै बन्द भएपछि काठमाडौँतर्फ आउँदै गरेका र बाहिरिँदै गरेका हजारौँ यात्रु तथा सवारी साधनहरू बिच बाटोमै अलपत्र परेका छन्।
प्रशासनका अनुसार जोखिम कम नभएसम्म र कटान रोकिएर सडक मर्मत नभएसम्म सवारी साधन सञ्चालन गर्न सकिने अवस्था छैन। प्रहरी तथा प्राविधिक टोलीले स्थिति अनुगमन गरिरहेका छन्।
