काठमाडौं । पृथ्वीराजमार्गअन्तर्गत धादिङको कृष्णभिरमा थप पहिरो गएपछि पैदलयात्रुलाई समेत आवतजावतमा रोक लगाइएको छ।
रसुवामा आएको बाढीपछि त्रिशूली नदीमा आएको ठूलो बहावले सडक कटान गर्दा कृष्णभिरमा सडक भासिएर पहिरो गएको हो।
आइतबार बिहान सडकको किनारतर्फको केही भाग भासिएपछि उक्त सडकखण्डमा सवारी आवागमन पूर्ण रूपमा बन्द गरिएको थियो। दिउँसो थप पहिरो खसेपछि अहिले पैदलयात्रुसमेत हिँड्न सक्ने अवस्था नरहेको प्रशासनले जनाएको छ।
त्रिशूली नदीको तीव्र बहाव सडकको भित्तामा ठोक्किँदा कटान बढ्दै गएपछि सडक भासिएको हो। पहिरोका कारण सडकको ठूलो हिस्सा नै खसेकाले पृथ्वीराजमार्ग तत्काल सञ्चालनमा आउने सम्भावना न्यून रहेको बताइएको छ।
प्रशासनले जोखिमलाई ध्यानमा राख्दै यात्रुलाई उक्त क्षेत्रमा नजान र वैकल्पिक मार्ग प्रयोग गर्न आग्रह गरेको छ।
