पाँच दिनदेखि बेपत्ता पूर्व प्रहरी सहायक निरीक्षक अर्जुन थापा : परिवारको एउटै प्रश्न–‘न सास, न लास, कहाँ हुनुहुन्छ बाबा?’

गोरखा । गोरखाको बारपाक सुलिकोट गाउँपालिका–६ ताकुकोट, चापापानी निवासी तथा नेपाल प्रहरीका पूर्व प्रहरी सहायक निरीक्षक (सई) अर्जुन थापा रसुवा–टिमुरे हुँदै चीन जाने क्रममा पाँच दिनदेखि सम्पर्कविहीन भएपछि परिवार गहिरो चिन्तामा परेको छ।
वि.सं. २०३२ सालमा जन्मिएका थापा करिब ३० वर्ष नेपाल प्रहरीमा सेवा गरी देश र जनताको सुरक्षामा योगदान गरेका पूर्व प्रहरी कर्मचारी हुन्। प्रहरी सेवाबाट अवकाश लिएपछि उनी रोजगारीका सिलसिलामा चीन जाने तयारीमा थिए।
परिवारका अनुसार थापा नक्साल, गैरीधारास्थित सम्राट ट्रेकिङ ट्राभल्स एन्ड टुर्सबाट भिसा लगायतका प्रक्रिया पूरा गरी भदौ ९ गते काठमाडौंबाट रसुवातर्फ गएका थिए। सोही दिन साँझ रसुवाको धुन्चेमा बसेका उनी भदौ १० गते बिहान रसुवाको टिमुरेतर्फ पुगेका थिए।
टिमुरेबाट इमिग्रेसन पुगिसकेपछि थापाले बिहान करिब ८ बजे आफ्नी श्रीमती मिना थापालाई फोन गरी ‘हामी अब चीन जाँदैछौँ’ भनेर जानकारी गराएका थिए। त्यसपछि भने उनको मोबाइल सम्पर्कविहीन भएको परिवारले जनाएको छ।
त्यसै दिन रसुवा क्षेत्रमा भीषण बाढी–पहिरो आएको खबर सार्वजनिक भएपछि परिवार झनै आत्तिएको हो। त्यसयता लगातार पाँच दिन बितिसक्दा पनि अर्जुन थापाको जीवित वा मृत अवस्थाबारे कुनै जानकारी प्राप्त हुन सकेको छैन।
‘बाबाको नाम कतै समाचारमा आउँछ कि भनेर दिनभरि मोबाइल हेर्छौँ’
अर्जुन थापाका दुई छोरी अन्जु थापा र आशिका थापा तथा श्रीमती मिना थापा अहिले उहाँको खोजीको पर्खाइमा छन्।
बाढी प्रभावित क्षेत्रमा उद्धार भइरहेका समाचार र सामाजिक सञ्जालमा विभिन्न व्यक्तिका शव भेटिएको खबर सार्वजनिक भइरहँदा छोरीहरू हरेकपटक मोबाइल र समाचारतर्फ आँखा लगाउने गरेका छन्।
‘कतै बाबाको नाम पो आउँछ कि? जीवितै उद्धार हुनुभएको खबर पो आउँछ कि?’ भन्ने आशामा परिवार दिनरात बिताइरहेको छ।
श्रीमती मिना थापा श्रीमान् सकुशल फर्किएर आउने आशामा छिन्। तर पाँच दिन बितिसक्दा पनि कुनै खबर नआएपछि परिवारको पीडा झनै गहिरिएको छ।
उता गोरखामा रहेका अर्जुनका वृद्ध आमाबुवा छोराको अवस्थाबारे खबर नपाएपछि विक्षिप्त अवस्थामा छन्। परिवारका अनुसार छोरा बेपत्ता भएको खबरपछि उनकी आमा बेहोस हुने अवस्था पुगेकी छन् र स्वास्थ्य अवस्था कमजोर भएपछि सलाइन पानी लगाएर राखिएको छ।
‘३० वर्ष देशको सुरक्षा गरेका बाबालाई खोज्न राज्यले पनि विशेष पहल गरोस्’
अर्जुन थापाका छोरीहरूले आफ्ना बुबा नेपाल प्रहरीमा रहेर करिब ३० वर्षसम्म देश र जनताको सुरक्षामा योगदान गरेको स्मरण गर्दै अहिले उहाँ आफैं विपद्मा परेको अवस्थामा राज्यले विशेष प्राथमिकताका साथ खोजी तथा उद्धारमा पहल गर्नुपर्ने माग गरेका छन्।
उनीहरूले नेपाल सरकार, सुरक्षा निकाय, स्थानीय प्रशासन, सम्बन्धित निकाय तथा रसुवा क्षेत्रमा उद्धारमा खटिएका सबै टोलीलाई अर्जुन थापाको खोजीलाई प्राथमिकतामा राखेर तत्काल खोजतलास तथा उद्धारका लागि पहल गरिदिन अनुरोध गरेका छन्।
‘हामीलाई न सासको खबर छ, न लासको। पाँच दिनदेखि उहाँको पर्खाइमा बसेका छौँ। हाम्रो बुबा कतै घाइते अवस्थामा उद्धारको प्रतीक्षामा हुनुहुन्छ कि, कतै सुरक्षित ठाउँमा सम्पर्कविहीन भएर बस्नुभएको छ कि भन्ने आशा अझै छ। सरकारले उहाँको खोजीमा गम्भीरतापूर्वक पहल गरिदियोस्,’ भन्दै छोरीहरूले भावुक अपिल गरेका छन्।
‘फोटो देख्नुभयो भने जहाँ भए पनि खबर गरिदिनुहोस्’
परिवारले अर्जुन थापाको फोटो तथा विवरण सामाजिक सञ्जाल र सञ्चारमाध्यममार्फत सार्वजनिक गर्दै रसुवा, टिमुरे, धुन्चे वा अन्य कुनै स्थानमा उहाँलाई देख्ने, भेट्ने वा उहाँबारे कुनै जानकारी प्राप्त गर्ने व्यक्तिले तत्काल परिवार वा सम्बन्धित निकायलाई खबर गरिदिन आग्रह गरेको छ।
परिवारको आशा अझै मरेको छैन।
श्रीमती मिना थापा र छोरीहरू अन्जु तथा आशिका थापा एउटै आशामा छन्–‘हाम्रो बाबा सकुशल फर्किनुहोस्।’
बाढी–पहिरोबाट प्रभावित रसुवा क्षेत्रमा अझै खोजी तथा उद्धार कार्य जारी रहेका बेला पूर्व प्रहरी कर्मचारीसमेत रहेका अर्जुन थापाको अवस्था तत्काल पत्ता लगाई परिवारलाई सत्यतथ्य जानकारी गराउन सम्बन्धित राज्य संयन्त्र र सुरक्षा निकायसँग परिवारले जोडदार माग गरेको छ।
बेपत्ता : अर्जुन थापा
जन्म : वि.सं. २०३२
स्थायी ठेगाना : बारपाक सुलिकोट गाउँपालिका–६, ताकुकोट, चापापानी, गोरखा
पारिवारिक अवस्था : श्रीमती मिना थापा, दुई छोरी अन्जु थापा र आशिका थापा
पेशा : नेपाल प्रहरीका पूर्व प्रहरी सहायक निरीक्षक (सई)
अन्तिम सम्पर्क : भदौ १० गते बिहान करिब ८ बजे, रसुवा टिमुरे इमिग्रेसन क्षेत्रबाट
अवस्था : पाँच दिनदेखि सम्पर्कविहीन
अर्जुन थापालाई देख्नुहुने वा उहाँको अवस्थाबारे कुनै जानकारी पाउनुहुने महानुभावहरूले कृपया परिवार तथा सम्बन्धित निकायलाई तत्काल जानकारी गराइदिनुहुन परिवारको हार्दिक अनुरोध छ।