काठमाडौं । भोटेकोशी बाढीपछि बेपत्ता नेपाली तथा विदेशी नागरिकको पहिचानका लागि डीएनए परीक्षण प्रक्रिया अघि बढाइएको छ । नेपाल प्रहरीले बाढीपछि फेला परेका शव तथा शरीरका अङ्गको डीएनए परीक्षण गरी पहिचान गर्ने व्यवस्था मिलाएको जनाएको हो ।
पहिचान हुन नसकेका शव तथा शरीरका अङ्गसँग सम्बन्धित आफन्तलाई आवश्यक डीएनए नमुना उपलब्ध गराउन प्रहरीले आग्रह गरेको छ ।
नेपालमा रहेका सम्पर्कविहीन व्यक्तिका बाबु, आमा, छोरा वा छोरीमध्ये कुनै एक जना पहिलो तहका नातेदारले ताजा रगतको नमुना दिनुपर्नेछ । नमुना उपलब्ध गराउन महाराजगञ्जस्थित प्रहरी अस्पतालको प्रयोगशाला वा नजिकको जिल्ला प्रहरी कार्यालयमा सम्पर्क गर्न सकिने प्रहरीले जनाएको छ ।
त्यस्तै, विदेशमा रहेका पहिलो तहका नातेदारले आफू बसेको मुलुकको आधिकारिक प्रयोगशालाबाट डीएनए प्रोफाइलिङ गराई त्यसको डिजिटल प्रतिलिपि प्रहरीको आधिकारिक इमेलमा पठाउन सक्नेछन् ।
प्रहरीका अनुसार शव तथा शरीरका अङ्गको पहिचानका लागि ‘डीएनए प्रोफाइल’ तुलना गरिनेछ । त्यसका लागि सम्बन्धित व्यक्तिको पूरा नाम, पहिचानसम्बन्धी विवरण, सम्भव भएसम्म सम्पर्कविहीन भएको मिति र स्थान, अधिकृत फरेन्सिक प्रयोगशालाबाट प्राप्त डीएनए परीक्षण प्रतिवेदन तथा नमुना दिने व्यक्ति र सम्पर्कविहीन व्यक्तिबीचको नाता विवरण आवश्यक पर्नेछ ।
