झापा। नेपालको पूर्वी सीमा नाका कांकडभिट्टामा सशस्त्र प्रहरी बलले उच्च प्रविधिको ‘गोप्रो क्यामेरामार्फत निगरानी सुरु गरेको छ। सीमा सुरक्षा, सूचना सङ्कलन तथा आपराधिक गतिविधि नियन्त्रणलाई प्रभावकारी बनाउने उद्देश्यले सशस्त्र प्रहरी बल नेपाल नं. २ गण हेडक्वार्टर झापाले उक्त प्रविधि प्रयोगमा ल्याएको हो।
सीमा क्षेत्रमा अवाञ्छित वा आपराधिक घटना भएमा घटनाको प्रत्यक्ष प्रमाण सङ्कलन गरी अनुसन्धानलाई थप पारदर्शी र वस्तुनिष्ठ बनाउन गोप्रो क्यामेरा उपयोगी हुने सशस्त्र प्रहरी उपरीक्षक सचिन कर्माचार्यले बताए।
उनका अनुसार हाल गणले दुई थान गोप्रो क्यामेरा सञ्चालनमा ल्याएको छ। सीमा क्षेत्रमा हुने अवैध तस्करी, चोरी–निकासी तथा अन्य सीमा अपराध नियन्त्रणमा क्यामेराको प्रयोगले महत्वपूर्ण सहयोग पुग्ने विश्वास गरिएको छ।
सशस्त्र प्रहरीको प्रविधिमैत्री र सक्रिय परिचालनले सीमावर्ती क्षेत्रमा सुरक्षा निगरानी थप प्रभावकारी हुने अपेक्षा गरिएको छ। स्थानीयवासीले समेत शान्ति–सुरक्षा कायम गर्न सशस्त्र प्रहरीलाई सहयोग गर्दै आएका छन्।
