काठमाडौं । प्रतिनिधिसभाको बैठक ६ दिनपछि बस्ने गरी स्थगित भएको छ ।
बिहीबार बसेको बैठकमा आकस्मिक, शून्य र विशेष समयअन्तर्गत सांसदहरूले विभिन्न विषयमा धारणा राखेका थिए ।
बैठकमा युवा, श्रम तथा रोजगारमन्त्री रामजी यादवले बालश्रम (निषेध तथा नियमित गर्ने) विधेयक, २०८३ लाई दफावार छलफलका लागि सम्बन्धित समितिमा पठाइयोस् भन्ने प्रस्ताव प्रस्तुत गरेका थिए । उक्त प्रस्तावलाई सभाले स्वीकृत गरेको छ ।
त्यसैगरी ऊर्जा, जलस्रोत तथा सिँचाइमन्त्री विराज भक्त श्रेष्ठले नेपाल–भारतबीच दीर्घकालीन विद्युत् व्यापारसम्बन्धी सम्झौता सभामा पेस गरे ।
कानुन, न्याय तथा संसदीय मामिलामन्त्री सोबिता गौतमले संयुक्त राष्ट्रसंघीय सामुद्रिक कानुनसम्बन्धी महासन्धिअन्तर्गत राष्ट्रिय क्षेत्राधिकारभन्दा बाहिरका क्षेत्रमा सामुद्रिक जैविक विविधताको संरक्षण तथा दिगो प्रयोगसम्बन्धी सम्झौता पनि प्रस्तुत गरिन् ।
बैठकका कार्यसूची सम्पन्न भएपछि सभामुख डोलप्रसाद अर्यालले प्रतिनिधिसभाको अर्को बैठक भदौ २४ गते बस्ने जानकारी गराउँदै बैठक स्थगित गरेका हुन् ।
