काठमाडौं । संयुक्त राष्ट्रसंघको आसन्न महासभामा सहभागी हुन प्रधानमन्त्री बालेन्द्र शाह आगामी साता अमेरिकाको न्यूयोर्क प्रस्थान गर्ने भएका छन्।
सरकारी खर्चमा मितव्ययिता अपनाउने तथा वैदेशिक भ्रमणलाई चुस्त बनाउने नीतिअनुसार प्रधानमन्त्री शाहको सचिवालयबाट चार जना सहयोगी मात्रै भ्रमण टोलीमा सहभागी हुने भएका छन्। टोलीमा प्रधानमन्त्रीका प्रमुख सल्लाहकार कुमार बेन, प्रमुख स्वकीय सचिव सुवास शर्मा, निजी सचिव प्रदीप परियार र आधिकारिक फोटोग्राफर विनय शाक्य रहनेछन्।
प्रधानमन्त्रीको भ्रमण टोलीमा कूटनीतिक तथा परराष्ट्र मामिलाको समन्वयका लागि परराष्ट्रमन्त्री शिशिर खनालसहित परराष्ट्र मन्त्रालयका वरिष्ठ अधिकारीहरूको पनि सहभागिता रहनेछ।
महासभाका क्रममा प्रधानमन्त्री शाहले विभिन्न देशका राष्ट्र तथा सरकार प्रमुखसँग द्विपक्षीय भेटवार्ता गर्ने कार्यक्रम छ। उनले जलवायु परिवर्तन, क्षेत्रीय सुरक्षा तथा विकासशील मुलुकले भोगिरहेका साझा चुनौतीलगायत विषयमा नेपालको धारणा प्रस्तुत गर्नेछन्।
सरकारी खर्च घटाउने र विदेश भ्रमणमा हुने अनावश्यक खर्च नियन्त्रण गर्ने नीतिअनुसार प्रधानमन्त्री शाहले आफ्नो निजी सचिवालयबाट सीमित व्यक्तिलाई मात्रै भ्रमण टोलीमा समावेश गरेका हुन्।
