काठमाडौँ- रसुवाको भोटेकोशीमा आएको बाढीले पक्की पुल बगाएपछि यातायात सम्पर्क विच्छेद भएको नुवाकोटको देवीघाट क्षेत्रमा नेपाली सेनाले एक्रो ब्रिज जडानको काम सम्पन्न गरेको छ।
यातायात आवागमन सहज बनाउने उद्देश्यले नेपाली सेनाले पाँच दिनअघि पुल जडानको काम सुरु गरेको थियो। सेनाको टोली निरन्तर खटिएर छोटो समयमै सो कार्य पूरा गरेको हो।
नयाँ पुल जडान भएसँगै आज बिहीबारदेखि पैदलयात्रीका लागि आवतजावत खुला गरिएको छ। त्यसैगरी शुक्रबारदेखि सवारीसाधनसमेत सञ्चालनमा ल्याइने जनाइएको छ।
यसअघि भोटेकोशीमा आएको बाढीले देवीघाट क्षेत्रको पक्की पुल बगाउँदा नुवाकोट तथा आसपासका क्षेत्रको यातायात सम्पर्क पूर्ण रूपमा विच्छेद भएको थियो। नेपाली सेनाले वैकल्पिक पुल जडान गरेपछि स्थानीयवासी, व्यापारी तथा यात्रुलाई आवतजावतमा सहजता हुने भएको छ।
