काठमाडौं । राजविराजस्थित गजेन्द्रनारायण सिंह सगरमाथा अस्पताल परिसरबाहिरै एक महिलाले बच्चा जन्माएको घटनाप्रति स्वास्थ्य तथा खाद्य स्वच्छता मन्त्रालयले गम्भीर ध्यानाकर्षण जनाएको छ।
घटनाको सत्यतथ्य छानबिन गर्न नेपाल मेडिकल काउन्सिलका रजिस्ट्रार डा. सुप्रभात श्रेष्ठ र एथिकल कमिटीका डा. अजय शाहसहित पाँच सदस्यीय टोली आजै राजविराज जाने भएको छ।
मन्त्रालयका तर्फबाट उपचारात्मक सेवा महाशाखाका प्रमुख डा. पवनजंग राईमाझी पनि छानबिन टोलीसँगै राजविराज जाने भएका छन्।
मन्त्रालयले घटनाबारे अस्पताल प्रशासनसँग स्पष्टीकरणसमेत मागेको छ। घटनाको स्थलगत अध्ययन तथा छानबिन गरी सत्यतथ्य बाहिर ल्याइने र दोषी देखिएमा सम्बन्धित व्यक्तिमाथि प्रचलित कानुनबमोजिम कारबाही गरिने मन्त्रालयले जनाएको छ।
घटनाको छानबिनका लागि अस्पतालले पनि छुट्टै समिति गठन गर्ने भएको छ। स्वास्थ्य संस्थामा उपचारका लागि आउने कुनै पनि सेवाग्राहीलाई स्वास्थ्य सेवाबाट वञ्चित गर्न नहुनेमा जोड दिँदै मन्त्रालयले घटनालाई गम्भीर रूपमा लिएको जनाएको छ।
मन्त्रालयले घटनाको आवश्यक अध्ययन तथा छानबिन प्रक्रिया अघि बढाइसकेको जनाएको छ।
