काठमाडौं– नेपाली कांग्रेसका शीर्ष नेता डा. शेखर कोइराला र पूर्वकार्यवाहक सभापति पूर्णबहादुर खड्का कुनै पनि पक्षले आयोजना गर्ने महाधिवेशनमा सहभागी नहुने अडानमा देखिएका छन्।
कांग्रेस कोइराला पक्षका नेता केदार कार्की तथा सभापति गगन थापानिकट नेताहरूका अनुसार कोइराला र खड्का दुवै तत्काल कुनै पक्षमा नलागी पार्टीभित्र समन्वयको भूमिका निर्वाह गर्ने अवस्थामा पुगेका हुन्।
कोइरालाले आफू कुनै पनि महाधिवेशन वा बैठकमा सहभागी नहुने स्पष्ट पारेका छन्। उनले पार्टीलाई एकताबद्ध बनाउन आफू बीचमा बसेर प्रयास गरिरहेको बताएका छन्।
‘म कुनै महाधिवेशन र बैठकमा सहभागी हुन्नँ। बीचमा बसेर पार्टी मिलाउन लागिरहेको छु। सकेसम्म मिहिनेत गर्छु, कहिलेसम्म सक्छु,’ कोइरालाले भनेका छन्, ‘म कांग्रेसको इमानदार कार्यकर्ता हुँ। यता–उता लाग्दिनँ, बीचमा बसेर पार्टी मिलाउन भूमिका खेलिरहन्छु।’
कांग्रेसका एक शीर्ष नेताका अनुसार खड्का पनि पछिल्लो समय सभापति थापासँग नजिकिएका छन्। तत्कालै औपचारिक रूपमा सहकार्य गरेर एउटै पक्षमा उभिने अवस्था नरहे पनि खड्काले आफ्ना निकट नेताहरूलाई सानेपा पठाएर आफू भने बीचमा बस्ने अडान लिएको ती नेताले बताए।
कांग्रेस महामन्त्री गुरू घिमिरेका अनुसार खड्काको धारणा पनि पार्टीलाई एकताबद्ध गरेर अघि बढ्ने रहेको छ।
‘पूर्ण दाइको भनाइ कांग्रेस एक बनाएर जाऊँ भन्ने हो। हामी निरन्तर संवादमा छौँ। उहाँ कसरी एक बनाएर जाऊँ भन्ने हिसाबले अगाडि हुनुहुन्छ। उतातर्फका धेरै साथीहरू यता जोडिइरहनुभएको छ, संवाद जारी छ,’ घिमिरेले भने।
उनका अनुसार कांग्रेसले शेरबहादुर देउवासहित अन्य नेताहरूलाई पनि एकताबद्ध भएर अघि बढ्न आह्वान गरिरहेको छ।
यसैबीच बिहीबार सानेपामा कांग्रेस केन्द्रीय कार्यसमिति बैठक जारी रहँदा ज्ञानेन्द्रबहादुर कार्की, राजीवविक्रम शाह र रामहरि खतिवडालगायतका नेताहरू पनि बैठकमा सहभागी भएका छन्।
