कर्णाली । कर्णाली प्रदेश सरकारले प्राविधिक शिक्षालय/विद्यालयका प्रशिक्षकका लागि सुर्खेतमा सीपमूलक प्रशिक्षण सञ्चालन गरेको छ ।
कर्णाली प्रदेश सरकार सामाजिक विकास मन्त्रालयले सुर्खेतको वीरेन्द्रनगरमा आजदेखि सीपमूलक प्रशिक्षण सुरु गरेको हो । प्रशिक्षण यही असार १० गतेसम्म सञ्चालन हुनेछ ।
प्रशिक्षणको उद्घाटन गर्दै सामाजिक विकास मन्त्री घनश्याम भण्डारीले घरेलु क्षेत्रमै रोजगार बजार सृजनाका लागि पर्याप्त जनशक्ति उत्पादनका लागि प्रशिक्षण आवश्यक भएको बताए । उनले प्राविधिक शिक्षाप्रति पछिल्लो समयमा चासो घट्दै गइरहेको सन्दर्भमा अब नयाँ सोचका साथ योजनाबद्ध रूपमा सक्रिय हुन आग्रह गरे ।
सामाजिक विकास मन्त्रालयअन्तर्गत प्रदेश परियोजना सहयोगमा कार्यरत प्रदेश प्रबन्धक वेदप्रसाद डाँगीले प्राविधिक शिक्षालय तथा विद्यालयमा अध्यापनरत प्रशिक्षकहरूका लागि विधि र सीप केन्द्रित प्रशिक्षणात्मक सीपमूलक तालिम सञ्चालन गरिएको बताए। तालिममा कम्प्युटर विज्ञान, सिभिल इन्जिनिरियङ, फरेस्ट्री, बाली तथा पशु विज्ञान र फार्मेसी ट्रेड (विषय)सँग सम्बन्धित मुगु, जाजरकोट, दैलेख र सुर्खेतका २५ प्रशिक्षकहरूको सहभागिता रहेको जनाए।
प्रबन्धक डाँगीका अनुसार सिटिइभिटीका आङ्गिक प्राविधिक शिक्षालय, प्राविधिक शिक्षा सामुदायिक विद्यालय र निजी विद्यालयमा कार्यरत प्रशिक्षकहरूलाई प्राविधिक तथा व्यावसायिक विधि र सीप कक्षा कोठामा कसरी प्रशिक्षार्थीहरूलाई प्रदान गर्ने भन्ने बारेमा तालिम दिइनेछ । चालु आर्थिक वर्षको यो चौथो ब्याज हो । प्रदेश सरकारले भने सिटिइभिटीका आङ्गिक शिक्षालयहरूमा सरकारी लगानी बढाएको बताएको छ ।
