काठमाडौँ । लगातारको वर्षाका कारण सडकमा बाढी, पहिरो, ढुङ्गा खस्ने तथा अन्य प्राकृतिक विपद्को जोखिम बढेपछि नागढुङ्गा नाकाबाट उपत्यकाबाहिर जाने सवारीसाधनको आवागमन अर्को सूचना जारी नभएसम्मका लागि रोकिएको छ।
प्रहरीका केन्द्रीय प्रवक्ता प्रहरी नायब महानिरीक्षक अविनारायण काफ्लेका अनुसार यात्रु तथा सवारीसाधनको सुरक्षालाई ध्यानमा राख्दै नागढुङ्गा हुँदै सञ्चालन हुने सवारी आवागमन अस्थायी रूपमा बन्द गरिएको हो।
यस्तै, फर्पिङ–दक्षिणकाली–मकवानपुर सडकखण्डमा पनि सम्भावित जोखिमलाई मध्यनजर गर्दै सवारी सञ्चालन रोकिएको प्रहरीले जनाएको छ। कुनै आपत्कालीन अवस्था वा समस्या परेमा नजिकको प्रहरी कार्यालय वा प्रहरीको आपत्कालीन सेवामा सम्पर्क गर्न अनुरोध गरिएको छ।
यसैबीच, नारायणगढ–मुग्लिन सडकखण्डको तुइन खोलामा ढुङ्गा खस्न थालेपछि र सेती दोभान क्षेत्रमा लेदो बग्न थालेपछि उक्त सडक पनि दुवैतर्फबाट बन्द गरिएको छ।
देशका विभिन्न स्थानमा अझै निरन्तर वर्षा भइरहेकाले सडक यात्रा गर्दा उच्च सतर्कता अपनाउन र सम्बन्धित निकायबाट जारी सूचना पालना गर्न प्रशासनले आग्रह गरेको छ।
