एजेन्सी । इंग्लिस प्रिमियर लिगमा लिड्स युनाइटेडले आफ्नो अपराजित यात्रा कायम राख्दै शीर्ष तीनमा स्थान बनाएको छ । सोमबार राति भएको खेलमा न्युक्यासल युनाइटेडलाई ४–१ गोलले पराजित गर्दै लिड्सले सिजनमा आफ्नो प्रभावशाली प्रदर्शनलाई निरन्तरता दिएको हो ।
इल्यान्ड रोडमा भएको खेलमा लिड्सको जितमा जेडन बोग्ले, डोमिनिक काल्भर्ट–लेविन र नोह ओकाफोरले एक–एक गोल गरे । लिड्सले एक गोल भने उपहारस्वरूप पाएको थियो । न्युक्यासलका लागि बाजोउमाना टोरेले एक गोल फर्काए ।
खेलको ३२औँ मिनेटमा न्युक्यासलका लेविस मिलेले आफ्नै पोस्टमा आत्मघाती गोल गरेपछि लिड्सले अग्रता लिएको थियो । त्यसको दुई मिनेटपछि बोग्लेले गोल गर्दै लिड्सको अग्रता २–० मा पुर्याए ।
पहिलो हाफको इन्जुरी समयमा काल्भर्ट–लेविनले गोल गरेपछि लिड्सले ३–० को अग्रता बनाउँदै पहिलो हाफ समाप्त गर्यो ।
दोस्रो हाफमा पनि लिड्सले आक्रामक खेललाई निरन्तरता दियो । खेलको ५९औँ मिनेटमा ओकाफोरले गोल गर्दै घरेलु टोलीलाई ४–० को सहज अवस्थामा पुर्याए । खेलको ९०औँ मिनेटमा टोरेले न्युक्यासलका लागि एक गोल फर्काए पनि टोलीलाई हारबाट जोगाउन सकेनन् ।
जितसँगै लिड्सले चार खेलबाट आठ अंक जोडेको छ र अंकतालिकाको तेस्रो स्थानमा उक्लिएको छ । समान चार खेलबाट पाँच अंक जोडेको न्युक्यासल १२औँ स्थानमा छ ।
